ಪ್ರತೀಕ್ಷೆ

ಹನಿಗೆ ಹರಿದು ಅರ್ಣವನ ಸೇರುವ ಪ್ರತೀಕ್ಷೆ,

ಅರ್ಣವನಿಗೆ ನೀಲಮೇಘವಾಗಿ ತೇಲುವ ಪ್ರತೀಕ್ಷೆ!!

ಭೂತಕ್ಕೆ ಭವಿಷ್ಯದ ಚಪ್ಪರದ ಪ್ರತೀಕ್ಷೆ,

ವರ್ತಮಾನಕ್ಕೆ ಭೂತದ ಪುಟಗಳ ಬಿಚ್ಚುಕೊಳ್ಳುವಿಕೆಯ ಪ್ರತೀಕ್ಷೆ||

ತೆರೆದೋದದ ಪುಟಗಳ ನಡುವೆ ಮುದುಡಿ ಕುಳಿತ ಬೀಗಕ್ಕೆ ಬೀಗದ ಕೈಯ ಪ್ರತೀಕ್ಷೆ,

ತನ್ನೊಲವಿಗೆ ಮನಸುಗಳ ಉದ್ಯಾನವನದಲ್ಲಿ ಕಂಪು ಪಸರಿಸಲು ಪ್ರತೀಕ್ಷೆ!!

ಬರಡು ರಂಗಮಂದಿರದಲ್ಲಿ ಭಾವನೆಗಳ ನರ್ತನ ಅರ್ಥೈಸಿಕೊಳ್ಳಲು ಕಲಾವಿದನಿಗೆ ಬತ್ತದ ಪ್ರತೀಕ್ಷೆ,

ಸಮಯದೋಟದ ಹರಿವ ತಡೆಯಲು ಕಾಲಜ್ಞಾನಿಗೆ ಪ್ರತೀಕ್ಷೆ||

ಜೀವಂತ ಪಾತ್ರಗಳಿಗೆ ಖಂಡಕಾವ್ಯದೊಳಗೆ ನುಗ್ಗುವ ಪ್ರತೀಕ್ಷೆ,

ನಿರ್ಜೀವ ಅಕ್ಷರಗಳಿಗೆ ಭೂರಮೆಗೆ ಬಂದು ಮೆರೆದಾಡುವ ಪ್ರತೀಕ್ಷೆ!!

ದುಃಖಕ್ಕೆ ಕರಗಿ ಹರಿಯುವ ಪ್ರತೀಕ್ಷೆ,

ಸುಖಕ್ಕೆ ತನ್ನಯ ಆಯುಷ್ಯ ವೃದ್ಧಿಯ ಪ್ರತೀಕ್ಷೆ||

ಕಳ್ಳೀಗಿಡಕ್ಕೆ ರುಚಿಯಾದ ಹಣ್ಣುಬಿಡುವ ಪ್ರತೀಕ್ಷೆ,

ಮನ್ವಂತರಕೆ ಮಗದೊಮ್ಮೆ ಮರುಕಳಚುವ ಪ್ರತೀಕ್ಷೆ!!

ಗೌಪ್ಯತೆಗೆ ಜನಪ್ರಿಯತೆಯ ಪ್ರತೀಕ್ಷೆ,

ಅದೇ ದಂತಕತೆಗೆ ಸತ್ಯವಾಗಿ ಶಾಶ್ವತಸ್ಥಾನಿಯಾಗುವ ಪ್ರತೀಕ್ಷೆ||

ಮರಳಿಗೆ ಅಲೆಗಳ ಮುನ್ನುಗ್ಗಿ ತನ್ನ ಬಾಹುಬಲವ ವಿಸ್ತರಿಸುವ ಪ್ರತೀಕ್ಷೆ,

ಭಗ್ನಪ್ರೇಮಿಗೆ ನೆನಪ ಪರ್ವತ ಕರಗುವ ಪ್ರತೀಕ್ಷೆ!!

ಕವಿಗೆ ಕವಿತೆಯ  ಸುಂದರ ಅಂತ್ಯದ  ಪ್ರತೀಕ್ಷೆ,

ಬೆಳಕಿಗೆ ಕಾರ್ಗತ್ತಲ ಚದುರಿಸಿ ಮುನ್ನುಗ್ಗುವ ಪ್ರತೀಕ್ಷೆ||

ನಿರ್ಲಕ್ಷಿಸಲ್ಪಟ್ಟ ಮಾತುಗಳಿಗೆ ಮುಖ್ಯಭೂಮಿಗೆ ಬರುವ ಪ್ರತೀಕ್ಷೆ,

ಕಪ್ಪು ಬಿಳುಪಿನ ಛಾಯಾಚಿತ್ರಕ್ಕೆ ವರ್ಣಗಳಲ್ಲಿ ಮಿಂದೇಳುವ ಪ್ರತೀಕ್ಷೆ!!

ನಿರ್ಮೋಹಕ್ಕೆ ಮೋಹವ ಆಲಂಗಿಸುವ ಪ್ರತೀಕ್ಷೆ,

ದಿಕ್ಕಿಲ್ಲದ ಆಲೋಚನೆಗೆ ಅನುಷ್ಟಾನವೆಂಬ ನೆಲೆಯ ಪ್ರತೀಕ್ಷೆ||

ಕರಗಿದ ಚಂದ್ರನಿಗೆ ಪೂರ್ಣತೆಯ ಪ್ರತೀಕ್ಷೆ,

ಇತ್ತ ಧೂಳಿನ ಕಣಕ್ಕೆ ನಭೋಮಂಡಲದಲ್ಲಿ ಒಂದಾಗುವ ಪ್ರತೀಕ್ಷೆ!!

ಆಡದ ಮಾತುಗಳಿಗೆ ಎಲ್ಲವ ಮೌನದ ಸೋಗಿನಲ್ಲಿ ವ್ಯಕ್ತಿಗತಗೊಳಿಸುವ ಪ್ರತೀಕ್ಷೆ,

ವೇದಾಂತಕ್ಕೆ ಜಾನಪದದ ಜೊತೆಗೂಡುವ ಪ್ರತೀಕ್ಷೆ||

ಅಷ್ಟಕ್ಕೂ ಅಪೇಕ್ಷೆಯಿಲ್ಲದ ಪ್ರತೀಕ್ಷೇ ಯಾವುದು?ಕಾಲಗರ್ಭದಲ್ಲಿ ಉತ್ತರ ಇನ್ನೂ ದಕ್ಕದು!!!!